كاترينا واللون الاسود
المفروض اني كنت اكتب هنا عن كاترينا وام كاترينا والست صاخبة الماما بتاع كاترينا
بس مش عارف حاجه طقت في دماغي اني اشوف البلوج بتاع زرياب ليه ؟ معرفش ممكن عشان اول ما قررت اني اشغل البلوجر بتاعي وابعد عن المنتدى شويه واخذ صاخب الانا قال روخ سوف بلوج زرياب
دا بلوج خلو كتير المهم اني ملقتش البلوج بتاعه ولقيت بلوج هوا مشارك فيه
المهم كوني ابص على الناس اللي حطيتلي ردود خلاني افتح كل المدونات اللي عرفتها والف والف
والف بعد تلات ساعات اخدت بالي اني كان المفروض اني ارجع واكتب عن كاترينا
عشان افتكر انا كنت عايز اكتب ايه ؟ ابدا طب ليه ؟ ولا الهوا
بس ححاول اجمع لان الحاجه الحلوه الوحيده اللي عملتها اني حطيت اسم الموضوع ورحت عثت في البلوجرات تجوالا
كاترينا واللون الاسود
اول ما بدأ الكلام عن الحاجه كاترينا كان الخوف كل الخوف من انه يحصل تأثير على الحفارات الموجوده على سواحل امريكا المعرضه للاعصار
انا بما اني مواطن فاشل معرفش غير اني اعترض قلت نفط ولا مش نفط ماهو في الاخر انا مش حستفاد حاجه وانا اصلا لا افقه شئ في البورصه غير انها ناس بتزعق وخلاص (اللي اموت وافهمه الناس دي بتعرف تفرق بين الناس اللي بتزعق ازاي ؟؟؟)المهم اني مكنتش متابع في بداية اول يوم للاحداث
في نفس اليوم بالليل داخل على منتداي المفضل ( اللي حصله موت مفاجئ بعد هروب اغلب كتابه منه) قهوة كتكوت
لقيت بني ادم غريب شمتان جدا في اللي حصل في امريكا .... مش عارف لحد الان احنا ليه بنيجي في الهايفه ونتصدر؟ حتى ايام 11/9واللي حصل من اخواننا في فلسطين والعراق من مظاهرات رافعين صور بن لادن وحتى في مصر من بعض المتخلفين المسميين نفسهم باي اسم سواء اسلاميين او سلفيين ولا اعتقد ان لو حد من السلف او من المسلمين الحق شافهم الا وكان تف عليهم
بس ما علينا
المهم شماتة الاخ اياه استفزتني جدا اني افهم فطلعت زيي زي جمل عطشوه 10 تيام وشربوه مره واحده ميه بدألج يمين وشمال ورحت رامي نفسي على الكنبه وبتفرج على الجزيره لقيتها بامانة الله عايزه الحرق العربيه اوسخ وا زل الحره كانت في دنيا تانيه
قلبت على الMBc4 لقيت شغال الاخبار من cbsقلت الحمدلله حاجه محترمه ناقصين بس يترجموا النشرات المباشره وتبقى تمام:D
المهم لاحظت حاجه ان اغلبية الموجودين على الشاشه هم من الزنوج الامريكان حاولت انتبه قليلا عشان الاقي خيال ظل ابيض معدي ولا الهوا
قلت ممكن عشان الدنيا ليل والنظر بأه على قده
تاني يوم لاحظت نفس الموضوع تالت يوم نفس الفكره النهارده لقيت الموضوع زاد عن حده ماهو مش معقول ان امريكا اتقلبت لزيمبابوي وانا مش واخد بالي
اكتشفت فيما بعد ان دول اللي مقدروش يغادروا الولايه وانهم الفقرا بتوع نيو اورليانز اللي مقدروش يهربوا قبل الكارثه او مكنش في حد يدعمهم غير اخواننا البيض طبعا اللي في الف مؤسسه حكوميه امريكيه تقدم الدعم لهم صحيح كان في كام دراع ابيض ووسط احمر بس دا كان عباره عن شذوذ كبير عن القاعده
كان السؤال اللي دائما بيطرأ على بالي ليه ؟ ليه دائما حتى في اعتى الدول الديمقراطيه والرأسماليه والعلمانيه حتى في موجود التفرقه الطبقيه الواسعه والعنصريه دي ؟
ليه رغم دوله زي امريكا معروف عنها تشددها العلماني على الرغم من وجود رئيس حمار بيتبنى الفكر اللي بيدعي كونه مسيحي محافظ بس مازالت امريكا قلعه من قلاع الليبراليه في العالم رغم كل القيوم الحميريه اللي عملها الحمار الاكبر المدعو جورج بوش الابن (كل ما اتفرج على فيلم مور 11/9فهرنهايت او اقرى كتاب رجال بيض اغبياء احس بجد اد ايه نعمة ان ربنا خلق لنا حاجه تدعى مخ )
مازال السؤال اللي مش قادر افهمه
ليه الفقر دائما واللون والطبقه هما اللي بيقتلوا الانسان في كل مكان ؟
ليه الحياه بتتوقف عند لونك او جيبك او نوع هدومك ؟
طيب ليه الغباء المضاد اللي بيقابل بيه الحوادث دي اخواننا المحسوبين زورا وبهتانا على الفكر الاسلامي
ليه ميحاولوش يستفادوا من حاجه زي كدا ؟ ليه ميكونش في توعيه او محاولة وصول للمتضررين دول ؟ ليه ميكونش في محاولة نشر فكر مش لازم اسلامي خلينا نقول انساني اتى به النبي محمد (ص) كلنا عارفين ان الانسان اللي بيكون في حاجه بيكون محتاج جدا للايمان والاستقرار النفسي
ليه ميكونش لهم اليد في التحول لكدا ؟
مش عارف ان كان السؤال صعب ولا مستحيل
بس اعتقد انه مش حيكون له حل قريب .. عجبني جدا كلام كتبه لون ولف
عن حضوره لاجتماع كفايه ومدى التشرزم اللي كانوا فيه
اعتقد ان دا حال الوطن كله بس هل يا ترى حنعرف احنا كجيل جديد نعمل حاجه ؟
مستمر السؤال في طرح نفسه
