« Home | لمن تنصب المشانق ؟ » | سئ » | ابواسلام2 » | ابو اسلام » | دعوه لانشاء مكتبة--الوقفه الاحتجاجيه امام نقابة ال... » | صور لمجاعة النيجر » | -وقفه احتجاجيه يوم الاحد » | تأجيل الاجتماع او الغائه » | عندما صوتت الملائكه لصالح الاخوان » | تخاريف قبل النوم » 

17.12.05 

وقفه بالملابس السوداء احياءا لذكرى الاربعين



دعوه وصلتني عن طريق الايميل وساشارك فيها

موعدنا الاثنين 19ديسمبر2005 أمام دار القضاءالعالي وقفة احتجاجية صامتة بالملابس السوداء من الساعة 12-1 ظهرا

يقوم بها نشطاء تجمع المستقلين المصريين

إحياءً لذكرى الأربعين لوفاة الديموقراطية مع بداية الانتخابات النيابية المصرية في 9نوفمبر الماضي

والتي قتل فيها 13 مواطنا سقطوا شهداء على أيدي الشرطة و بلطجية الحزب الحاكم في مصر.



يد تجمع المستقلين المصريين

yad_hand@yahoo.com

أولا متضامن مع هذه الدعوة التي لن ألبيها لأني سأكون في العمل ساعتها

و لو لبي كل الشباب كل هذه المواعيد الصباحية لن يستفيد في النهاية سوي اتحاد شباب العاطلين الذي سيلتهم الحركة بالكامل

عندي استفسارين بشان تجمع المستقلين هذا
بما انهم اسسوا تجمعا فهم لم يعودوا مستقلين
ثم ما كل هذه التجمعات و الاطارات
و الموضوع للأسف يعني " عد غنمك يا جحا "
انتظر ظهور " تجمع المستقلين الذين ليسوا في أي تجمع "


والله يا عم عمرو حوصل للناس تساؤلك انا مجرد مشارك بشخصي وجهدي في العمل
بس اعتقد ان المعنى اللي عايزين يوصلوه هو
انهم مجموعه من المستقلين عن اي تيار او حركه
وانهم مختلفين ايدلوجيا تماما عن بعض
ممكن نقول شبيه كفايه بس من الناحيه الحقوقيه
(اشتغلوا مع امهات المعتقلين ومع السودانيين الجنوبيين المعتصمين في ميدان التحرير قبل كدا ودلؤتي في المهندسين وهم اللي دعوا الى مظاهره اسماء محمد علي ونهى الزيني الماضيه)
وفكرة ان الموضوع حيكون الساعه 12 الضهر عشان دا حيرافق خطاب الرئيس داخل مجلس الشعب بمناسة افتتاحه
فدا شئ رمزي
والمظاهره بتاعة اسماء ونهى الزيني كانت مساءا الساعه 6
فدي ظروف الحدث لا اكثر ولا اقل
:)

نظم تجمع يد وقفة احتجاجية لساعتين أمام دار القضاء العالي اليوم الإثنين 19-12-2005و في توقيت خطاب الرئيس المصري مبارك أمام مجلسي الشعب و الشورى و في ذكرى الأربعين لبداية انتخابات مجلس الشعب الأخيرة
و ذلك حدادا على أرواح الشهداء الذين سقطوا في الانتخابات البرلمانية المصرية

بيان الوقفة:
الحزب الوطني قتل 13 نفر و جرح ألف ف شهر واحد... و لسه بيحكم ..؟؟

بتسألوا إحنا هنا ليه و لابسين إسود على مين؟؟
إحنا هنا عشان اللي ماتوا ف الانتخابات و لسه بيموتوا على إيدين الحزب الحاكم في البلد دي.

عشان "عواطف عبد السلام كميجة" الفلاحة اللي اتقتلت وهي بنت عشرين سنة بالقنابل اللي رماها الحزب الوطني يوم26 نوفمبر لجل يمنع المواطنين من الخروج للتصويت ف دايرة شبراخيت محافظة البحيرة، و دي طبعا موش أول ولا آخر مين يتقتل على إيدين النظام ف الانتخابات، عندك الريس جمعة الزفتاوي ، صياد قتلوه البلطجية ف بلطيم- كفر الشيخ يوم 3-12 ، و كمان عم عبد الحميد 55 سنة- قنا اللي البوليس قتله برصاصتين يوم 20 نوفمبر لما كان ماشي لا بيه و لا عليه ، وولاده الخمسة اتيتموا ، وعندك السعيد الدغيدي أستشهد يوم الأربعاء 7/12/2005 في قرية الخياطة دمياط وساب وراه ثلاث بنات وطفل أيتام وزوجة أرملة، إيه؟؟ هو العادي في مصر إن الناس تموت ببلاش؟؟
ها يعيشوا لمين، مافيش حياة كريمة تحت وصاية هذه الحكومة الفاسدة، دول افسدوا حتى هواء و ماء و تراب مصر باستيراد المواد اللي بتجيب و العياذ بالله السرطان و الأمراض الخبيثة، حكومة بتخلي المواطن محتاس و بيضرب أخماس ف أسداس، و بيحسبها بالمليم و القرش قبل ما يشتري لقمة و لا هدمة نضيفة لولاده.
مين قال إننا مجتمع آمن، و إن الناس عندنا تقدر تخرج بالنهار أو تسهر بالليل من غير خوف؟ إزاي أمان و البلطجية ماليين إقسام البوليس، و الحكومة بتربيهم عشان تطلعهم ينهشوا في أعراضنا و يضربوا و يقتلوا عيني عينك ومن غير محاسبة، زي ما حصل ف الانتخابات، مين يجيب حقنا منهم و يحاسبهم طالما الحكومة هي اللي طالقاهم وحمياهم .
لما يتقتل 13 شخص على إيد بلطجية الحزب الحاكم ف الانتخابات و يتجرح آلاف و يُعتقل قدهم، و يستخدم النظام عبوات حارقة و ناسفة و غازات مسيلة للدموع و خناجر وسيوف، هي دي أدوات النظام ف مصر لحكم الشعب، النظام الفاسد القاتل اللي بيذل بلـدنا من 25 سنة يعني ربع قرن كامل ، يبقى لازم نخاف و لازم نعمل حاجة.
لأ و إيه .. مبارك اللي دلوقتي حالاً بيتكلم أدام مجلس الشعب و الشورى، زعلان قوي عشان الجماعة الأوربيين في اجتماعهم في برشلونة من أسبوعين جابوا سيرة البلطجة بتاعته، و اتكلموا عن سيئات مملكته اللي بيديرها و حاشيته من الظلمة و القتلة و النخاسين ...
ربنا يستر ع البلد دي، طالما الحكومة بتقتل الناس عشان تمنعهم من التصويت، و بتقتلهم عشان تسرق منهم أرضهم اللي بيزرعوها، و بتقتل العمال ف المصانع لما بتخليهم يشتغلوا وسط مواد مليانة سُميـّات و بلاء أزرق، تبقى دي حكومة موش أمينة على مواطنيها ،يبقى ده نظام بيحتقر شعبه ، و تبقى دي سلطة بتتعالى على الغلابة، و مع كده بتسرق من قوتهم وقوت ولادهم، و الألعن كمان بتشحت على حسهم من الدول الغربية و تحط الفلوس ف جيب المسئولين الكبار، و الشعب المسكين بيموت من غلو الأسعار.
إمتى نستريح من النظام لفاسد القاتل، من العصابة اللي بتحكم بلد فيها "خير أجناد الأرض"، أرحموا بلدا مر عليها الأنبياء و القديسون و الأجلاء من دعاة الحرية، احترموا تاريخ هذه البلاد و لا تسمحوا لمزيد من أيام عجاف تحت وصاية هؤلاء القتلة الذين لا يستحون أبدا، النهاردة ذكرى الأربعين لبداية انتخابات سال فيها دم طاهر و اتقتل فيها ناس غلابة، و ليهم حق علينا،و ع الأقل نقف حداد على أرواحهم البريئة، نقف مع أسرهم ، و لا نسمحش أبدا للفرعون يكرر مجازره مرة تانية .

يد (تجمع مستقلين مصريين) yad_hand@yahoo.com
الإثنين 19-12-2005

Post a Comment

عني

  • AUCWORKERS
  • Cairo, Egypt
  • AUC workers Strike
My profile

كتابات قديمه

مفضلتي