« Home | انا مش عاقل ولا مجنون » | زلزال جانا وفرحنا به بعد غيابه وبقاله زمان » | البيان » | إفتح الميه » | مظاهرة الخميس+اعتصام المرصد الاسلامي الجمعه » | قتل وتشريد واعتصام بالكنائس » | الارابيان+ابن رشد+سودان+عام جديد » | ابو اسلام...الافراج » | ابو اسلام في المنزل+شوية كلام » | الافراج عن ابو اسلام+محصلة يوم خنيق » 

10.1.06 

معارضه يا ولاد الكلب

دار حوار بيني وبين احد الاصدقاء(الصديقات)لا اتذكر حقيقه من كان
حول الدستور وابراهيم عيسى
اخبرتها ان السببين اللي بيخلوني اشتري الدستور دلؤتي انها اول جريده افتح عيني عليها وانا في اعدادي ولحد الان عندي اول 13 عدد من الاصدار الاول وحافظ مقدمة العدد الاول( اللي استهله عيسى بانهم شباب بيردتدوا نظارات كعب الكوبايه وعندهم امل في انهم يقدموا شئ جديد )ومقال الاعتذار( لما خلوا الجريده بجنيه واحد بدل من نص جنيه )ومقالات بلال فضل اللي بدأت تبقى ممله هي كمان زي بقية الجريده
كان حنق الصديقه هو نفس الحنق الذي لدي
الاتجاه الواحد المتماثل لديهم
صوت عالي عالي عالي عالي
كله شبه بعضه في الاتجاه
تبدأ من الصفحه الاولى(او الثالثه في بداية الاصدار التاني)
مع ابراهيم عيسى وزعيقه وشتيمته للمصريين
اتحركوا انطقوا صحيح انتوا ولاد كلب مافيش منكم فايده خاضعين اذلاء عبيد ارقاء ز ي ماقال عليكم جمال حمدان
وكل مره من بعد مقالته العبقريه عن الامام الحسين(س)ونفس التكرار العقيم لنظرية جمال حمدان في المواطن المصري اللي في الف نظريه اخرى بتقوضها من الاساس
بس مينفعش
لازم نطلطع اسبوعيا بمقال مبجل عن الفساد المستشري في البلد واللي دود الارض قبل طوبه عارف عنه كل حاجه
ويجي بعدها فاصل من جلد الذات
فوقوا اتحركوا ثوروا
يا كلاب ياولاد الكلب عارضوا
ابقوا معارضه يا ولاد الكلب
وجوا الجريده نفس الخط
يا اما تسخين على خط المحرمات المصريه
مره عن الاناجيل
مره عن الفتن الطائفيه
مره عن الجنس
اي تابوه والسلام ويقعدوا يقزقزوا فيه
انا مش معترض بالمره ان دا يحصل بس مش عمال على بطال
صيغة الهجوم العاليه والصراخ المدوي بعديه ايه ؟
يعني ايه الخطوه التاليه
جميل قوي الاقلام اللي بناخدها على وشنا وقفانا كل ما نقرى الجريده
ومغامرات سوسو وتوتو والنط من على السور والعالم المقطعه السمك وديله وخياشيمه كمان
ومزارات سياحيه وخمسه صياعه
بس بعد كدا ايه ؟
نفس مشكله كفايه
مظاهرات وشيتمه في الشوارع وحمايه من الامن وعدم تعرض(مؤخرا فقط)طب وبعدين ؟
زعقنا واتظاهرنا وخرجنا شوية الكبت اللي جوانا
ايه الخطوه التانيه بعد الزعيق ؟
الخطوه التانيه بعد شتيمة الدنيا والدين
والقاء كل المشاكل على المتطرفين ايدلوجيا وشماعة الاخوان وعملاء وزير الثقافه والبراجمتيين والليبراليين الخ الخ
الخطوه التاليه ايه بعد الشتيمه ؟

ولاهوا كله شتيمه شتيمه
مافيش ضرب ؟
ولا هي مجرد
معارضه يا ولاد الكلب
)

اتصدق يا مالك
انت فعلا جبت التايهة الحنجورية اياها اللى لا بتودى ولا بتجيب بس بتبضن الناس اللى عايز تهتم


تصدق انتا
اني مش فاهم انت عايز تقولي ايه ؟
قصدك اني بدلل على الوضع
ولا ببضن الناس؟
معلش اعذر اخوكي على ضعف حاسه الاستيعاب عندها
(زودها ياللي في بالي على مشكلة التخاطب)

ام ابو استك ده ... أفهمها لك ازاى ... بالعربى ... دعهم يصرخون فسنفعل مانريد ... بالمصرى .. أحا يعملوا اللى يعملوه مبارك عمهم و حابس دمهم ... من على القهوه .. دى ناس فاضيه يابا و عندها نت و مش بتدور على بريزتين يأكلوا العيال... يابنى من الاخر ... الانسان المصرى هزم من داخله ... عاوزين كاريزما جديده تصحيه

يا مالك اقصدهم هما اللى بيبضنوا الناس عشان فى الاخر الكل بيوصل للنص الخالد
ييه مفيش فايدة مفيش فايدة مفيش فايدة


انونيموس
ربنايكرمك ابقى رد بنك نيم بعد كدا
كاريزما تاني ؟
مشنبعاش من اللي عملته فينا الكاريزمات على مر التاريخ ؟
تاني كاريزما وتاني ما اخذ بالقوه لا يسترد الا بالقوه والديمقراطيه ذات الانياب وجيوش صلاح الدين وامامية الحاكم بالله وسعد سعد يحي سعد
وفي الاخر الشعب بياخد على قفاه ؟
تاني كاريزما وتاني قياده احاديه ؟
مينفعش يجي حد بخطه وديمقراطيه ورساله عدل ؟
يعني هو اللي خلق سيدنا النبي (ص)وسيدنا علي (س)وسيدنا عمر (ر)مخلقش غيرهم يا اخوانا
(انا هنا بتكلم عن امثله عربيه)ولا اتكتب علينا يا اما نحشر في بوقنا جزم معفنه يا نصرخ ونهلل زي المجاذيب


انا فاهم الاحباط اللي كلنا بنعاني منه
لكن برضه باعذر الناس اللي عمالة تشتم وبس
اولا لانهم - زي اغلب الشعب - مش خريجين العمل السري اللي بيخليهم يعرفوا ازاي يحققوا انتصارات ويدوا الحكومة على قفاها من غير ما تكون مستعدة للي بيخططوه
ثانيا لانهم - زي قلة من الشعب - شايفين المصيبة اللي احنا فيها ومش لا قيين اللي يسمعهم

الكاريزمات زي سعد زغلول وغيره مطلوبة دلوقتي لان دول اللي بيعرفوا يحركو الناس وبعد كدة ييجي دور مدرسة الديمقراطية في انها توصل الناس للمعرفة السليمة ده طبعا لو ما جاش انقلاب الاول نسى الناس كل حاجة

"يعني هو اللي خلق سيدنا النبي (ص)وسيدنا علي (س)وسيدنا عمر (ر)مخلقش غيرهم "
طيب وبعديهم حصل ايه؟؟

لا الكاريزما هتجل ولا برنامج سماوي هيحل
لازم الناس تفهم (ثقافة) وتجرب (ديمقراطية) وساعتها هتعرف تدرس مشاكلها (العلم) ويمكن تلاقي الحل الصحيح او تغلط لكن في النهاية لازم هتوصل

فبداية كسر الحلقة هي ان الناس تصحى من النوم ، مين عارف يمكن الجعجعة العالية تصحيهم


نديم
استوعبنا الكلام خلاﻻص:)
درش

اولا انا مقلتش عمل سري ومقلتش الناس متتكلمش
انا بكل بساطه بقول حاجه واحده
جلد الذات المتواصل على مدار اكتر من 12 عدد او زياده من ساعة عدد سيدنا الحسين حينتهي امتى ؟ ويبدأ طريق تاني من التغيير
الصوت العالي مفيد بس الاقتصار عليه مميت بجد
الناس بدأت تزهق انا شخصيا بطلت اجيب الدستور من كتر الاعاده المميته لــ عارضوا الله يخرب بيتكم اصحوا يا شعب ميت ياشعب مش عارف ايه ونظريات جمال حمدان اللي خلاص مبقاش جوا الواحد حمل يتحملها
ايه الخطوه التانيه انا بسئل عن الخطوه التانيه
التصعيد ازاي ؟
ايه علاقة كلامي دا كله بالعمل السري ؟
بالنسبه للكاريزمات
موضوع سعد زغلول وخلافه
سعد زغلول كان رجل يميني راس مالي مستفيد لابعد حد من النظام القائم على ايامه وتولى الوزاره من قبل اي ثوره حتى الثوره اللي اتعملت مكنتش عشان كاريزمته اد ماكان سخط عام من الناس على الاوضاع وتعاطفا مع الطلب اللي عايز يعرضه على عصبة الامم انذاك
وبعدين سعد جه عمل ايه للبلاد ؟
معاهده متخرمه اول ما جه خلفه (النحاس)ضرب بيها عرض الحائط ؟
ولا وزاره رأسها وبهدلت الدنيا؟
عمل ايه للشعب الطبقه العريضه اللي كان اكثر من 90 في المئه منهم جهله وشغالين في وسيات امثاله من البشوات ؟
ونفس الكلام على ناصر وحكم العسكر بتاعه او السادات او الكلب مبارك او صلاح الدين واضطهاداته العرقيه وغيرهم
بالنسبه للنبي محمد(ص)لا اقصد بضربي له كمثال انه حل سمائي
اقصد بضربي له انه شخص وضع القوائد بعضها سماويه والاخرى اجتهاديه وكان يقبل المشوره والتعدديه ورجع عن كثير عن ارائه عند تبين خطئها
وعلي كذلك
وعمر ابلغ مثال على تقبل الاراء
وغيرهم
لم اقصد بضربي لهم كمثال الحل السمائي بقدر ما اقصد انهم امثله على القياده الجماعيه الديمقراطيه المتقبله للاخر
وضربت بهم لانهم الامثله العربيه الاكثر اتفاقا حولها والاقل اختلافا

كويس يا مالك انك ابتديت تاخد بالك من الموضوع ده

مش الدستور بس بصراحة اللى عندها النبرة دى

دى تقريبا اغلب تصرفاتنا، بس يعنى انت عندك حل دلوقتى؟ وللا دا مجرد لفت نظر؟

ازاى ممكن تبدأ تغير فى السبعين مليون من غير زعيق وصوت عالى وشتيمة فى الحكومة ؟ ازاى ممكن القاعدة العريضة اللى زيها قبل كده خذلوا الحسين تاخد موقف النهادرة؟

بتهيئلى ان مقالة الحسين اللى كتبها عيسى كانت افضل ما فى موجة التهزيق اللى غرقانة فيها الدستور

باختصار يعنى.. عندك حل؟


بنت مصريه
هو اولا الموضوع كان مجرد لفت نظر في البدايه واعتراض على طريقة الدستور واشياء اخرى
اللي انا مش برفضها بس بعترض على الخط الثابت اللي ما بيتغيرش وكنت بتسائل
هل في حاجه تانيه ؟
مدعيتش في البدايه ان عندي حل
بس لو من حقي ان اعرض حل او اقول وانا مش موقن باي شكل من الاشكال من صلاحية الحل دا
فحقول ان لازم التركيز على قضية واحده والعمل عليها
وتكون القضيه دي على رغم من صغرها مؤثره
مثال على كدا
غاندي وحركة الملح اللي بدأه في الهند واللي على اثرها اخدت الهند استقلالها وبعدها انشأت اكبر ديمقراطيه في اسيا
او مارتن لوثر وروزا باركس
وكانت بداية الحركه مطلب زوغير الا وهو المساواه بين البيض والسود في ركوب المواصلات العامه واللي انتهت بمساواه تامه في كل شئ
(رغم كرهي الشخصي لمارتن لوثر)
الحل عندي هو التركيز على قضايا مؤثره ويمكن النجاح من خلالها وفي نفس الوقت مؤثره
يعني القضايا اللي تعني بالشأن الانساني
زي المعتقلين اللي بقالهم اكثر من 20 و25 سنه داخل السجون بدون تهم او خلصت مددهم
من وجهة نظري ان تحركي على الارض وضغط مباشر باشكال مختلفه عن التظاهر زي الاعتصام او الاضراب
حيكون اقوى وانجع
او قضية الصحفيات اللي اعتدى عليهم يوم الاستفتاء الاخير
واللي كان في مظاهره عشانهم(صباح مظاهرة السودانيين)
والاستاذ مجدي حسين قال انهم حيطلقوا حمله حيسموها 25 مايو عشان الصحفيات اللي اعتدوا عليهم وولا حس ولا خبر
او حتى ضحايا بني سويف
اي شئ يقوم عليه عمل مرتب وتكون المكاسب الغير مباشره كبيره اقلها ان حيكون فعلا فعل
حيكون فعلا في حاجه حتحصل
ومش بس مظاهره تلف وسط البلد وشتيمه في الامن ووزير الداخليه وموبارك وابنه ومراته
اعتقد حيكون اجدى لو حصل نوع من الاعتصام او الاضراب او اي شئ مشابه لغرض عزل نائب عام او مدير امن او حتى مين عارف وزير داخليه او عدل ومن بعدهم الموضوع يكبر
انا هنا مش بطالب بمكاسب صغيره او اي شئ مشابه
انا هنا بقول اننا لو مقدرناش نكسر شجرة الفساد مره واحده
يبقى بطل ما نشتم وندعي ونحسبن على الظالم والمفتري وابن الحرام
نبدأ نقطع في اغصان الشجره دي ونقطع عنها الميه ونحاول
مجرد فكره ممكن تكون خياليه لا منطقيه عبط وبارنويا حاده
بس دا حلي واتمنى اني اشوفه بيحصل

جميل اوى
نسيب بقى سياسة: سعد سعد يحيا سعد
ونمسك فى: لف وارجع تانى

اللى انت بتقوله مش بارانويا ولا حاجة، زى ما عرضت امثلة.. غاندى ولوثر وروزا.. نماذج حقيقية

بس التطبيق بقى..لو ينفع اقول: مدى مناسبة الافكار دى لمجتمعنا دا

يعنى مثلا، المظاهرات فى اوروبا بتجيب نتيجة
لما بنعملها فى مصر مش بتجيب نتيجة
ولا بتلم العدد المطلوب ولا بتظهر اعلاميا بالشكل المؤثر

يمكن المشكلة فى النهاية اننا محتاجين لأفكار ملائمة اكتر لطبيعة المجتمع

يعنى نفكر من البداية.. الى يحرك الناس؟؟ اللى يلفت نظرهم ويدفعهم للتغيير؟؟
يمكن نحتاج ندرس افكار المجتمعات التانية.. بس اكيد لما نطبق لازم نطبق الملائم لينا.. اللى يجيب نتيجة


جميل جدا
انا قلت افكاري مع مناسبتها وعدما مناسبتها
ومكنش من ضمنها المظاهرات على فكره
ايه هي الافكار اللي عندك ؟
او حتى الافكار موضوع الدراسه ؟
او حتى المنهج وممكن نوصل لحاجه

انا ذكت المظاهرات على سبيل المثا، مش لأنك بت سيرتها ولا حاجة

وكمان بفكر معاك بصوت عالى. معنديش حاجة محددة :)

الحل هو المال
معاك فلوس تعمل حاجات كثيرة

No money , no Honey


أعتقد ان في نقطة ما كانتش واضحة في كلامي، انا لما اتكلمت عن العمل السري، ما كانش عشان انت ذكرته بالعكس انا كنت باقول ان الناس اللي كانت بتعمل في العمل السري (اقصد الاخوان) عندهم قدرة اكبر على التعامل مع الوضع الحالي وده موضوع يطول شرحه

أما بالنسبة لسعد، فانا مش متفق معاك وبغض النظر عن كاريزمته لكن موضوع انهم تعاطفوا مع دعوته مش كافي طيب ما كان قدامهم عدلي يكن وما سالوش فيه، وموضوع سخط الناس مش ممكن يكون السبب لوحده طيب ما هي الناس قرفانة النهاردة ونايمة في العسل، ما نبسطش ثورة 19 ونعتبرها مجرد رد فعل جماهيري ولا حتى مجرد كاريزمة دي كانت عمل اكبر من كدة بكتير واعتقد انه محتاج دراسة مستفيضة في الوقت الحالي

اما ثورة 19 عملت ايه؟ اكيد انها ما انهتش الاستعمار وقضيت على الفقر وبنت جيش وطني وخلت كل الناس اغنياء ومبسوطين، وده برضه لازم نعرفه ان مشاكل الدول ما بتتحلش في لحظة بعصا سحرية
لكن انا باعتبر ان وضع دستور (بالرغم من ان سعد ما كانش موافق عليه) وانتخاب برلمان يمثل الشعب وتشكيل حكومة تحصل على ثقة البرلمان، دى انجازات مش قليلة
ما عرفتش قصدك على انهي معاهدة اللي وقعها سعد ان كان قصدك معاهدة 36 اللى لغاها النحاس سنة 51 فاللي وقع المعاهدة دي كان النحاس وقال في البرلمان (من أجل مصر وقعت المعاهدة ومن أجل مصر أعلن اليوم الغاؤها)
لو قصدك معاهدة تانية فانا مش عارفها

أما دعوتك لتبني قضايا صغيرة وخلق تحرك جماهيري عليها فانا اعتقد انها فكرة عبقرية وانها ممكن تحقق انجازات مش قليلة ،حتى لو في النهاية في ناس راحت قلبت الحكم وقالت العيال كانوا بيضيعوا وقتهم في قضايا تافهة، لكن انا في رايي ان ده اللي ممكن يهيئ الوضع لتغيير اكبر، والقضايا اللي انت ذكرتها قضايا كلها تنفع وخصوصا - في رايي- موضوع انتهاكات يوم الاستفتاء
اما عن نوعية التحرك اللي ممكن يتعمل فده يتوقف على القدرة على تحريك الجماهير، موضوع الاضرابات والاعتصامات محتاجة يكون عندنا تواجد عند الناس اكبر من حجمنا الحالي

انا فاهمك اننا كلنا قربنا نوصل لمرحلة اننا مش هنقدر نسمع الشتيمة في الحكومة من زهقنا وما فيش معنى انهم يستمروا يشتموا طالما ان نفس الناس اللي بتقرالهم، لكن خلينا ندور على اشكال جديدة للتحرك وفي نفس الوقت نسيب كل اللي بيحاول يعمل حاجة يعملها


بنت مصريه
انا فاهم قصدك
بس الفكره ببساطه اني كنت بحسب في افكار لديك :)
عموما مستنيها
شريف
مش شرط على فكره
اعتقد ان في حركات ياما حول العالم بدأت بصفر فلوس واعتقد انك عارف دا كويس بس الازمه في العقليه والاستراتيجيه
العقليه التنظيميه والاستراتيجيه التفاعليه اللي تخلي في دافع وراء الافكار التغييريه
اللي تقدر تدعو وتجمع الناس
انا شايف ان المال عنصر هام اه بس الاهم منه القدرات التنظيميه اللي لازم تتواجد لنجاح اي حركه
درش
بغض النظر عن مدى الاختلاف معاك حول دور سعد والحركه الليبراليه في اول القرن الماضي واللي لو فتحنا النقاش فيه مش حنخلص فعلا
(عدلي لم يقدم مطلب شعبي كالذي قدمه سعد غير ان عدلي كانت له تعاملات معروفه مع الانجليز بعكس سعد اللي تعاملاته وان وجدت فكانت مع القصر اللي كان في ذلك الوقت لدى الناس يعبر عن الشرعيه الوطنيه )
بس خلينا نركز في المشترك اكتر
كويس اننا اتفقنا على التحركات الزوغيره
واعتقد ان في حركات زوغيره او لسه بادئه ممكن اضمن تعاونها او مشاركتها في الاحداث دي
واعتقد ان تدرج المطالب تحت سقف واحد حيكون اجدى بكثير
عموما بعد الامتحانات وفضى الناس حنطرح اول اقتراح وغالبا حيكون شئ اشبه باعتصام او اضراب بشكل من الاشكال قدامين احد ثلاث اماكن
1-لاظوغلي
2-النائب العام
3-وزارة الثقافه

توجد نقطة وسطى..قد تكون بذرة حل في صُلب الموضوع الذي أشرت إليه ..وهو نقد لسيل جلد الذات الذي تتبعهُ جريدة الدستور كجريدة معارضة..
وهو تقديم مايدعم ويحفز البناء بجانب الهدم(أعتقد أن نتيجة جلد الذات المركز هذا لا يخرج عن كونه هدم ،لأنه محبط من ناحية ،ومن ناحية أخرى يمنح شماعات مناسبة لاتُحصى..تعزز عجزنا)
..
النماذج التي ذكرتها (محمد عليه السلام..عمر رضي الله عنه..وغيرهم)توافر لديهم الايجابية والصبر..
الايجابية تم تعزيزها بالايمان بحتمية التغيير وحتمية الفعل للوصول للتغيير المطلوب..والصبر..
..
مافي يدي أنا لو كنتُ مسئولةً عن جريدة معارضة..مثلاً
محاولة الموازنة..لا أقصد أن أبحث للحكومة عن حسنات لذكرها بجانب البلاوي الموجودة(وإن كنتُ لا أرى ذلك معيبًا بشكل ما)..
ولكني أقصد أكثر..أن أُبرز الصورة التي اريد الوصول اليها بطريقتين،الاولى رصد الامثلة الخارجية،لتظل المقارنة دافعًا للترقي..
والطريق الثاني..يشمل محاولة خلق طرق مناسبة لمجتمعي أنا ،لأحقق بها التغير الذي أعارض الحكومة لعدم وجوده..

_لا أعتقد في الدراسة والعلم والالمام كخطوة تسبق العمل في الظروف الحالية..كخطوة كافية..شبعنا دراسة ..لابد من متابعة الدراسة مع اتخاذ خطوة عملية ولو صغير نراعي الاضافة اليها..مع الوقت مجموعة الخطوات الصغيرة ستخلق تغييرًا_

أيضًا يشمل هذا الطريق الثاني ،عرض نماذج عملية معاصرة،بحيث يكون من وظائف الصحفي في مؤسستي كما يبحث عن الخبر السئ كخبر مثير،البحث عن الجيد،ونقاط الضوء..

____
ربما يبدو كلامي بهِ شئٌ ما..
لكني كتبتُ ما أؤمن حقًا أنه جزء من الحل،ولو كنتُ في موضع مسئولية فسأحاول تطبيقه بكل جهدي..


سديم
كلامك جميل جدا
بس السؤال هنا لينا احنا ككوننا مش في موضع مسؤوليه
حنعمل ايه ؟
حنعمل ايه عشان نشوف الخطوه التاليه للمظاهرات والشتيمه والصوت العالي وضعف التجاوب الجماهيري بشكل سئ جدا لدرجه ان ناس ياما بدأت تزهق فعلا وتمل
ايه الخطوه التاليه؟
دا كان السؤال اللي حاولت اضع له اجابه ما.


أعرف ان ظروف الامتحانات تعيق حركة الكثيرين الآن ولكن ألا توجد وسيلة لاستغلال كأس الأمم الافريقية؟
لاشك انه سيحظى بتغطية اعلامية قوية، وأي فعاليات تتم في الملاعب (لافتات/ اعتصام/هتافات/...) ستجتذب الاعلام الدولي بشكل مفيد
فهل هناك وسيلة لتنسيق مثل هذه الفعاليات في المدة القصيرة الباقية(بضعة أيام)؟

Post a Comment

عني

  • AUCWORKERS
  • Cairo, Egypt
  • AUC workers Strike
My profile

كتابات قديمه

مفضلتي